Rais asisitiza jeshi la polisi kuendelea kufanya kazi zake vyema

Rais wa zanzibar na mwenyekiti wa baraza la mapinduzi dk. ali mohamed shein amesisitiza haja kwa jeshi la polisi kuendelea kufanya kazi zake vyema  hapa zanzibar ili kuimarisha amani na utulivu iliyopo hasa ikizingatiwa kuwa uchumi wa zanzibar unategemea utalii ambao unahitaji kuwepo kwa usalama.

Dk. shein ameyasema hayo leo ikulu mjini zanzibar wakati alipokuwa na mazungumzo na kamishna wa polisi zanzibar, mohamed haji hassan aliyefika ikulu kwa ajili ya kujitambulisha akimuahidi  kumpa mashirikiano makubwa kamishna huyo.

katika maelezo yake, dk. shein amemueleza kamishna huyo mpya kuwa uchumi wa zanzibar unategemea kwa kiasi kikubwa katika shuhuli za utalii, hivyo ni vyema usalama ukaimarishwa, ili sifa ya zanzibar ikiunganishwa na vivutio vilivyopo izidi kuimarika na kuendelea kuwavutia watalii kutoka pande zote za duniani.

Amemueleza kuwa mapato ya zanzibar yamezidi kuongezeka sambamba na pato la taifa kutokana na kuongezeka kwa watalii kila uchao na kupelekea kukua kwa uchumi wa zanzibar, ambapo hiyo yote inatokana na kuwepo kwa usalama mkubwa kwa wananchi na wageni wanaokuja kuitembelea zanzibar.

Hata hivyo dk. shein amesisitiza haja ya jeshi hilo kuendeleza doria katika maeneo yote hapa nchini hasa katika ukanda wa hoteli za kitalii sambamba na kuhakikisha watalii hawabughudhiwi na badala yake wanapata huduma zote za kitalii zilizo nzuri na zenye usalama.

Aidha, amemueleza kamishna huyo mpya wa polisi zanzibar haja ya kushirikiana vyema na jamii katika kupiga vita suala la udhalilishji wa kijinsia kwa akina mama na watoto hasa ikizingatiwa kuwa jeshi hilo ndio linaloshughulikia mashauri ya matukio hayo.